CHOMBEZO; NELLY MUOSHA MAGARI WA POSTA-5

Mpenzi msomaji, wiki iliyopita niliishia pale fundi Yassin alipomtambulisha Nelly kwa Zakayo aliyekuwa akimsaidia kazi na kwamba wangekuwa wote kazini jambo ambalo Zakayo hakuamini kufuatia muonekano wa kisharobaro wa Nelly. Je, kilifuatia nini? Songa mbele…

Baada ya utambulisho huo, fundi na vijana wake waliendelea na safari ya kwenda site lakini Zakayo alikuwa bado aamini kama Nelly aliyeonekana sharobaro angefanya kazi ya kubeba zege.

Walizidi kupiga stori za hapa na pale huku Nelly akistaajabu majumba makubwa ya kisasa yaliyojengwa ambapo fundi Yassin akawa anamuonesha majengo kadhaa ambayo alikuwa amechangia kuyajenga.

Baada ya kutembea kama dakika saba hivi, Nelly alishangaa wakiwa wapo kwenye bonge ya jumba lenye geti kubwa jeusi, fundi Yassin akamwambia walikuwa wamefika site.

Kauli ya fundi huyo ilimshangaza Nelly kwa sababu hakuona nyumba iliyokuwa ikijengwa lakini hakumwuliza hadi fundi Yassin alipobonyeza kengele ya getini ndipo alitokea binti mmoja mrembo akafungua, Nelly alipomuona moyo wake ulipiga paa!

“Kumbe ni wewe fundi umekuja, karibuni!” mrembo huyo alimwambia fundi Yassin huku akimtupia macho Nelly.

“Asante Doreen, vipi bosi yupo?” fundi Yassin alimwuliza Doreen.

Baada ya kuulizwa hivyo, msichana huyo ambaye alikuwa akimwangalia Nelly kwa kuibia alimfahamisha kwamba baba na mama  yake walisafiri alfajiri ya siku hiyo kwenda Arusha.

“Eh! Mbona jana hakuniambia na vipi kuna maagizo aliyokuachia?” Fundi Yassin alimwuliza Doreen.

“Kaniambia kila kitu mtazungumza kwenye simu,” Doreen alimfahamisha fundi.

Baada ya kuambiwa hivyo fundi alimtambabulisha Nelly kwa Doreen na kumwambia watakuwanaye pale kazini kisha akamtambulisha Doreen kwa kijana huyo mwenye dimponsi.

“Yaani naye ni fundi au amekuja kutembea ni ndugu yako?” Doreen alimwuliza fundi kwani kwa jinsi alivyomuona Nelly hakufanana kabisa na kazi za ujenzi alizokuwa akizifanya fundi Yassin.

“Yeah! Atakuwa ananisaidia kazi kama wanavyofanya akina Zakayo na wenzake,” fundi Yassin alimfahamisha Doreen bila kujua ni namna gani Nelly aliumia moyoni.

“Da yaani fundi badala ya kusema mimi ndugu yake nimekuja kutembea anaweka wazi kila kitu kwa huyu mtoto mkali, kaharibu kinoma!” Nelly alizungumza kimoyomoyo.

Baada ya fundi kutoa kauli hiyo, Doreen ambaye hakuamini kama ni kweli Nelly alikuwa fundi alifunga geti kisha alimwambia fundi Yassin alikuwa ndani na kama watahitaji kitu wamwite Anne ambaye alikuwa msichana wao wa kazi.

Wakati fundi Yassin akitoa utambulisho huo, Zakayo alikuwa amekwisha zunguka nyumba ya nyumba hiyo ambako kulikuwa na jengo lingine lililokuwa likijengwa.

“Nelly hapa ndipo site ninapofanya kazi mwezi wa pili sasa, nyumba yah ii nyumba bosi wangu anaangusha mjengo mwingine,” fundi Yassin alimwambia Nelly.

Fundi alimwongoza Nelly hadi eneo hilo ndipo kijana huyo mwenye dimponsi ambaye akili yake ilikuwa kwa Doreen alibaki akishangaa ukubwa wa jumba la yule bosi na ingine aliyokuwa akijenga kwa nyuma yake.

“Kweli kuna watu wana fedha jamani, mijengo yote hii ya mtu mmoja?” fundi Yassin alimwuliza fundi.

“Wewe unashangaa nyumba hii, ukienda huko mbele ndiyo balaa watu wamefanya kufuru balaa,” fundi Yassin alimwambia Nelly.

Walipofika kwenye nyumba ya pili ambayo ilikuwa ikiwekwa malumalu, walimkuta kijana mwingine akipanga malumalu, alipomuona fundi Yassin alimwamkia.

Baada ya kumwamkia, alimtazama kwa makini Nelly na kumwambia; “Vipi Mambo?”

“Poa, za kazi?” Nelly alimsabahi.

“Nzuri, karibu!” kijana huyo alimkaribisha Nelly aliyesema asante.

“Hatuni, huyu hapa anaitwa Nelson Nzamba lakini tunapenda kulikatisha jina lake na kumwita Nely, ni jirani yangu tutakuwanaye pamoja kwenye kazi zetu,” fundi Yassin alimtambulisha Nelly kwa Haruni.

Kufuatia utambulisho huo, kama ilivyokuwa kwa Zakayo, Haruni hakuamini kwa muonekano wa Nelly kama alifanana na kazi za kukoroga zege, akamwuliza:

“Fundi bwana kwa masihara umezidi, yaani atakuwa akikoroga zege na kukubeba matofali, malumalu kama sisi?”

“Ndiyo, kwani unamuonaje?” fundi alimwuliza Haruni.

“Hata mimi nimemuuliza  kama wewe kaniambia hivyohivyo,” Zakayo akadakia.

“Kama nilivyowaleza naye tutakuwa tunafanya naye kazi,” fundi Yassin aliwaambia.

Kule ndani, Doreen kama ilivyokuwa kwa akina Harunu na Zakayo, akawa haamini kabisa kama Nelly ni fundi.

“Huyo kijana piga ua garagaza siyo fundi, nahisi atakuwa kaja kumpeleleza baba yangu, sijawahi kumuona sharabaro tena anayevaa miwani na mwenye dimponsi anafanya kazi za ujenzi,” Doreen aliwaza.

Usikose sehemu inayofuatia ya chombezo hii

                                          NELLY MUOSHA MAGARI  POSTA-5