PANYA ALIVYONISUMBUA KWA SIKU 20

Ilipoishia..

Kiumbe hiki chenye macho makali kilikuja mpaka karibu na kitanda changu na kunusa huku na huko mara kikapanda kitandani kwangu na kuanza kunitafuna miguu yangu. Nililia kwa maumivu makali lakini cha ajabu sikuweza kujinasua wala kutikisika..

Endelea..

02.

Baadaye nilishtuka lakini ilikuwa ni usiku mnene. Cha kushangaza kila nilipotaka kulala tena nilishindwa kabisa na wala siku na lepe la usingizi. 

Niliamua kuwasha simu yangu na kumtumia meseji kwa whatsapp mpenzi wangu Lydia kwa sababu hadi muda huo wa saa 9 usiku mtandao wake ulionesha alikuwa online.

Lakini kila nilipomtumia meseji zangu nilishangaa baada ya kuona akikaa kimya. Niliumia sana kwa sababu nilijua tu lazima atakuwa akichati na yule mpenzi wake wa zamani, Boniface maana nilishamfuma mara kibao lakini alikuwa akijitetea.

Kutokana na kukosa cha kufanya, niliamua kukitazama vizuri kile chumba, niliamka na kwenda kuwasha taa lakini ghafla nilihisi kitu kikikimbia kwa kasi na kupotelea nyuma ya sofa langu nililoliegesha kihasarahasara upande huo.

Nilisogea hadi kwenye lile kochi lakini nishangaa baada ya kuona mkia wa panya ukimalizikia kutoka kwenye shimo dogo lililokuwepo kwenye kona ya ukuta huo.

Nilirudi haraka kitandani baada ya kusikia simu yangu ikinguruma, mawazo yangu yote nikijua lazima Lydia atakuwa amenijibu kitu, mapigo ya moyo yakaanza kunienda kwa kasi maana jinsi ninavyompenda huyu mtoto Mungu mwenyewe ndiye anayejua.

Itaendelea..