TAMBUA WANAKUPENDA KWA SABABU UKO KWANGU!

ASANTE Mungu kwa Jumatatu nyingine murua, umenipa uhai, afya, nguvu na mengineyo yote ni kwa uweza wako. Mpenzi msomaji baada ya wiki mbili za machungu yaliyotokana na mada ya wale waliopoteza wapenzi au wapendwa wao, leo tunazungumzia namna ambavyo wapenzi wengine wamekuwa wakithaminiwa na wapenzi wao lakini wao hawathaminiki kwa sababu tu wanaume au wanawake wengi mtaani huwatamani na kusahau kuwa anayempenda ni mmoja tu na ndiye pengine aliyemchumbia au kufunga naye ndoa.

Wapenzi wengi wamejikuta wakihadaika sana na wapenzi walio nje ya uhusiano wao na kuwasahau waliowachagua na kuishi nao kama wenza wao. Wengi wamejikuta wakiangukia pua kwa kuchepuka na wapenzi ambao kwa uhakika wanakuwa si sahihi kwani waliosahihi ni wale tu waliowathamini na kuwaweka ndani.

Ukitaka kuamini ninachokisema, hebu jaribu kujitoa kwa aliyekuthamini na kukuweka ndani kisha uone kama yule uliyekuwa unachepuka naye ataweza kukuhudumia na kukupendezesha kama ambavyo ulikuwa na mchumba, mume au mke?
Mthamini na mpende yeye aliyekufikisha hapo, haijalishi ni magumu mangapi ambayo mmekutana nayo, usipende vitu vya bure na starehe za hapa na pale kutoka kwa wachepukaji. Aliyekuweka ndani ana nia nzuri na wewe na ndiyo maana amekuchagua uwe mwandani wake.
Pata japo nafasi ya kumwambia mwandani wako: “Tambua kuwa huyo bwana au mwanamke anakupenda tu kwa sababu uko kwangu, akiuona muonekano wako na jinsi hiyo shepu yako ilivyo, basi anakutamani na si kukupenda kama nikupendavyo mimi, kukuthamini kama ninavyokuthamini, nilikupenda na nilitambua thamani yako ndiyo maana nimekuweka ndani.

“Wazuri ni wengi sana dunia hii ila ninaamini siwezi kuwamaliza na ndiyo maana nilikuchagua wewe wa kipekee ambaye nitakupenda, nitakujali, nitakulinda na kukuthamini hadi kifo kitutenganishe.
“Yawezekana ulinikosea kwa kunisaliti, sitamani niyajue hayo bali ninakuomba ujirekebishe mpenzi wangu maisha yaendelee.

“Ninaamini kabisa wanaokutamani na kukutaka wapo wengi sana lakini sina uhakika kama usingekuwa kwangu wangekutamani kama ambavyo wanafanya kwa sasa, hawajui ni wapi tulikotoka, wanakutamani kwa sababu wanakuona ukiwa umependeza kwa nguo nadhifu nilizokuandalia, haukuwa hivi kipindi kile.
“Haukuwa umeng’ara kama ulivyo sasa, utanashati wako unawachanganya wengi, tafadhali, tulia na mimi kwani wewe ndiye faraja ya kweli ya maisha yangu, mimi ndiyo nuru ang’avu ndani ya mboni ya jicho lako lililokuwa limejaa giza.

“Nakujali na kukupenda kwa sababu tu umenipa nafasi ya kujua siri na udhaifu wako wa ndani, najua nini nikikifanya unafurahia, nafahamu nini nikikosea unachukia, tafadhali, usiwape nafasi wengine kwani wewe ndiye tunda langu lenye raha tele maishani mwangu. Ninaamini hao wengine wanakutamani tu kwa sababu ya matunzo ninayokupa. Najua wanakutamani kwa sababu ya muonekano wako ambao sehemu kubwa umechangiwa na matunzo na malezi yangu kwako.”

Usikose wiki ijayo kwenye mada nyingine tamu, pia usikose kutembelea ukurasa wetu wa Mimi na Uhusiano kwenye Mtandao wa Kijamiii wa Facebook, Insta:@mimi_na_uhusiano au tuna namba tukuunge kwenye group letu la WhatsApp.