AKICHEPUKA SINA WIVU NAYE WALA SIFURAHII FARAGHA YAKE

Mimi ni mama wa miaka 30 nina watoto 3 wote wa kiume, niliolewa nikiwa na miaka 18 naweza kusema sikuwa najitambua kihivyo.

 Nilijikuta nikikubali kuolewa  naye kwa sababu alinipata ujauzito kwa kuwa baba yangu alikuwa mkali na alikasirika sana nikaladhimika kuolewa tena kwa harusi kubwa sana yenye kila aina ya amshaamsha.

Mume wangu ana miaka 47 kwa sasa ninahisi alinioa nikiwa sina uhakika kama nilimpenda kwani sijawahi kusikia raha ya mapenzi nikiwa na mume wangu zaidi ya mateso. Kwa mtu ambaye unampenda wivu unakuwepo lakini kwangu wala sina na sijawahi hata kuwa na wivu naye.

Naweza kusema ninaishi naye kwa sababu ya hao watoto wangu niliozaa naye ila sina naye mapenzi ya dhati ingawa yeye ananipenda sana.

Nimefika sehemu nahisi kama hakuwa chaguo langu, kwani anaweza akalala nje  kwa siku kadhaa lakini hata siku moja sijawahi kumuuliza kuhusu hilo kiufupi simpendi tu sina furaha ya ndoa nipo nipo tu hata sijielewi kiukweli. Ninaomba ushauri wenu mimi mwanaM&U mwenzenu.